兔比的過年大雜燴紀錄。。。小可愛回歸 & 川龍早茶與林村祈願黨

今個農曆新年冇點去邊拜年，大多時間都係屋企同狗狗過，仲記得早前兔比於blog文中提及過暫養嘅唐狗BB女＂妹妹＂嗎？（前文回顧：別了暫托的小可愛。。。開Blog半週年小禮抽獎結果公佈！）大家都讚佢可愛呢！

新年幾日紅日恐怕冇人餵佢會餓壞，於是又帶返屋企照顧，相隔不足兩星期佢大隻左1／3，之前俾佢瞓覺嘅紙盒闊度已經唔夠佢長，生長速度非常驚人！最神奇係佢唔再周地大小便（一返黎就識），曉去報紙度尿尿同落街先開大，起碼唔駛成日抹地~

夜晚都唔再叫，不過由於佢太高可以自己爬上床，有朝兔比瞓下發覺有D野係大脾上面轉，嚇到即刻起身，原來佢爬左入被窩，最煩係＂妹妹＂成日周街瞓，雖然2日同佢洗一次白白都污糟ma．．．

俾佢嘅近照大家睇睇~佢宜家重到要雙手先夠力抱起

一個老積樣，手長腳長

小心惡犬！XD

玩波中．．．

佢仲有兄弟姊妹未有屋企收留，如果有愛心嘅您有興趣收養佢D兄弟姊妹，歡迎悄悄話留落電話~

大年初三兔比同朋友一行五人去左朋友仔家開既茶樓飲茶，哩間就係位於川龍村蠻多人認識既端記茶樓。識左哩個朋友仔幾年去過佢屋企幾次，食過BBQ同百圍盆菜，但咁神心去飲早茶都係第一次

紅日關係人好多，一出點心就人來人往

全自助形式要自己開茶擺位同拎野食，不過今次有主人家代勞，仲怕我地拎唔到點心送到上檯，認真係VIP式招待

食到一檯都係點心都只係酌量收每人$30，真係客氣！

原來川龍村既西洋菜好受歡迎，因為係村民自家種植，當日賣完就無架啦！有興趣可以買袋西洋菜返屋企煮

難得去到鄉村地方要去菜田同山澗感受一下大自然！唔少人帶埋網黎捉魚仔，有人仲撈到蠑螈~

下晝近近地去左林村許個新年願，新年特別人頭湧湧，沿路有好多賀年野買

個日仲有賀年表演睇，不過烈日當空都係唔好企響度乾煎 ，行到腳軟坐低歎碗豆花

意在過癮一行人只買左一份祈願品，有寶碟同蓮花燈

做得多攝影師都要出出鏡，點都要跟蓮花燈同寶碟留影~

大家好投入咁拋寶碟，又幾好玩wo~

大家都拋到啦！希望兔年心想事成！

如果唔想拋可以掛響許願長廊，感覺有D似日本神社既祈願方式

跳跳紮一輪後去放蓮花燈，原來係放響一個好似日本流水麵咁既水池上面，不過近睇都幾靚吧~可惜水流太細飄得好慢，一去到轉彎位就JAM晒，有花燈未燒完就燒爛左，坐定定等我地個花燈轉一圈，原來真係要好耐時間，仲以為佢未完成歷史使命就英勇殉職，睇到佢回程先捨得走~

兔比祝大家都可以如願！

最後加插兔比新年期間既旺桃花甲俾大家睇~ 底色係RMK新推Spring Shimmer系列Nail Color，之前出席RMK活動收到一支粉紫色試過唔錯（前文回顧：RMK魔法筆下的春色無邊），但隻色唔多match自己，於是敗左哩支桃紅for新年 甲邊貼上最愛既dot柄指甲貼紙（Vinnie送贈既~呵呵），簡單又搶眼！

Categories: ● 川龍, ● 林村, ● 茶樓, ● 許願樹, ● 飲茶, ● 端記, 生活點滴, 玩樂遊蹤