大玩台中(3)。。。薰衣草森林古堡漫遊 + 親親草泥馬

前文回顧：
大玩台中(1)。。。懷舊寶島 + 台中的晨光
大玩台中(2)。。。亡命馬術表演 + 眼科醫院敗手信？

上回Day 2 遊過日月潭，敗過手信又迫過夜市，Day 3係台中之行最後一日

食過早餐我地搭長途車出發！途經一段路僅僅夠一架車通過而且迂迴曲折嘅山路，終於到達是日第一站新社薰衣草森林

原來無幾耐之前哩度曾經發生火災，感謝訪客繼續支持期間限定免費入場

大門口歡迎我地有大大隻啤啤熊~

行左入黎有種遠離繁囂感覺

沿路行入去有售賣香草產品嘅市集同香草園

難得放慢步伐香草園賞賞花

香草園入面有香草House

入口處一個個小信箱都有不同香草味，除左薰衣草仲有薄荷、迷迭香等等

每個場景都有香草小知識

電話亭同房間場境都有陣陣薰衣草香

House出口處香草鋪子貨品比市集更多元化，如果買漏野大門口香草鋪子都可以再買

離開香草House往另一邊出發，森林中竟然有迴旋木馬，十足童話故事場景，好夢幻喔~

向前行係香草步道，時間所限無上去睇><

假日黎哩度野餐嘅人都真係蠻多

估唔到走一轉薰衣草森林收獲唔錯呢~ 敗左薰衣草薄荷膏同精油作手信

除左手信仲敗左薰衣草試管，又靚又香噴噴~

比較可惜係薰衣草仲未完全成長，欣賞唔到一大片薰衣草田嘅美麗畫面

第二站係不遠嘅新社莊園，富歐陸感古堡建築嘅大花園，係一個拍照好地方

通往小屋嘅小徑，好童話Feel~

歐陸式建築外有花團錦蔟靚景

池塘仲有鴨有魚

黎到咁靚嘅古堡單係到此一遊略嫌未夠，一於望住靚景食餐好！哩間六角亭餐廳二樓觀景台位置有少數座位，景觀超好！

我們一行人都點左套餐，包括沙律、餐湯、主菜及甜品，唔止賣相吸引味道都唔錯~ 沙律伴香橙味醬汁，份外清新

主菜兔比點哩款義式茄香烤雞腿，表層有茄膏同芝士，味道香濃仲烤到脆卜卜，食落似雞肉pizza~

友人嘅牛扒同豬手相比兔比份烤雞腿有點失色

不過兔比杯餐飲味道似足藥水（已經忘記咩名），友人話兔比點莓味飲品太笨蛋(๑≖ˇдˇ≖๑)

遊完新社莊園先發現兔比佬送嘅銀鐲跌左．．．戴左一星期就無左．．．傷心死 (இɷஇ ) 哩張大概係同佢最後嘅合照

離開新社兔比要求下地主David載我地去一睹草泥馬（羊駝），於是出發去據網路消息指有草泥馬嘅后里馬場，點知．．．

只有草、泥同馬．．．

仲有鴨就係無草泥馬．．．被騙了(๑꒪ㅁ꒪๑)"

失望嘅一行人逛左一圈就離開，后里馬場連大棠荔枝莊都不如！為一圓睇草泥馬願望，大隊改往天馬牧場，終於見到佢地啦！

以前見到草泥馬公仔一直都懷疑真身係咪真係咁可愛，原來佢地真係太太太可愛！

唔止溫馴仲完全唔怕同人親近

每隻個樣都好唔同，好似人咁有唔同Style，不過每隻正面嘅樣子都超級傻，每次睇返相都會發笑 XD

天馬牧場除左一眾可愛嘅草泥馬，仲有河馬、馬、鸚鵡、蜥蜴同小袋鼠

難得可以抱抱小袋鼠，好怕會將佢跌左落地呢~ 佢D爪好尖喔

夠膽的話可以抱抱蜥蜴，只係兔比摸都唔敢摸

本來已經好耐無敗毛公仔嘅兔比，一出牧場見到有草泥馬商品店，竟然忍唔住敗左一堆公仔，中左毒！講開又講個度D草泥馬公仔平香港好多，一隻只不過NT100，同友人一齊敗一堆可以再議價

三日台中之行完結，大隊出發往台北喇！台北行程不過往九份、東區、信義區同士林夜市，大家都唔陌生所以唔打算分享

特別嗚謝David，多得佢接送我地台中之行唔駛煩搭咩車，而且直上台北無須轉車同拉住行李去台北旅館，大家如果去台灣要搵包車可以聯絡 悅事旅遊租車

Categories: ● 薰衣草森林, ● 天馬牧場, ● 古堡, ● 台中, ● 台灣, ● 羊駝, ● 旅遊, ● 草泥馬, ● 森林, ● 新社, ● 新社莊園, ● 薰衣草, 玩樂遊蹤