敗家到台灣。。。激安價將美妝掃一網打盡！

不時都會有朋友問關於點揀化妝掃嘅問題，化好妝少不了有質素嘅化妝掃輔助，初初唔識揀只盲目認住知名品牌，當然知名品牌出品質素唔會差，無奈價錢未必人人可以負擔得起．．．平野就無信心？咁嘅心態絕對要改改

林三益為台灣毛筆老字號，後來憑籍製筆經驗轉型加入埋化妝掃行列，其出品之化妝掃深得臺灣知名化妝師喜愛，古小偉及游絲棋都係捧場客

十月台灣之行（前文回顧：大玩台中(1)。。。懷舊寶島 + 台中的晨光；大玩台中(2)。。。亡命馬術表演 + 眼科醫院敗手信？）兔比特別指明要友人帶路一到台北林三益敗化妝掃，雖有網店但始終不及睇到實物先買安心

估唔到今時今已經響化妝掃市場闖出名堂嘅林三益，實體店依舊繼續售賣毛筆，店面維持樸素平實

實體店同台灣網店所售貨品一樣，限量品及套裝都有，價錢跟網購相同

之前上網做過research屬意敗Secret- S系列18支組或5系列19支套裝，內容相近但唔明何解5系列會比S系列貴3倍有多，一問之下原來S系列為化纖毛混動物毛，而5系列為純動物毛，所以價錢相差咁大

最後兔比決定敗Secret- S系列18支組，反正自己唔係化妝師，無需要過份講究，毛質舒服就可以，一套18支包括面眼唇掃連皮套不過NT2900（約HK$780），比香港門市平左足足HK$100呢~ (*ꆤ.̫ꆤ*)

雖然混有化纖毛，摸落毛質都好鬆軟，掃上肌膚觸感順滑舒適，每支都包裝得非常妥貼，絕唔馬虎

S-01為蜜粉腮紅兩用掃，而S-02及S-03為腮紅掃，3支都係羊毛混化纖毛

大面積化妝掃毛質最緊要唔拮面，觸感柔軟，哩點絕對滿分，而且毛量夠多抓粉力不俗

眼影掃有5支切合不同需要，S-04至06為純貂毛，S-07及S-09為化纖毛，上粉狀眼影表現非常好

S-13為貂毛混化纖毛，S-14為化纖毛，個人唔多會用S-14，雖然幼細但掃毛比較長用黎畫眼線好難掌握，而且上唔到實色

S-10扇形掃以化纖毛製作

眉用掃都有3支

唇掃為貂毛，手抦跟其他唔同，握手感不錯~

林三益最為人熟悉必數心形掃同花型掃，花型掃最搶眼，色彩繽紛造型又可愛，手工超精巧！一睇到實物已經好鍾意，店員阿姨表示哩個掃抓粉表現最好，每次所沾取胭脂蜜粉份量更省但已做到理想效果

立體圓弧設計加上純羊毛製作，唔單止外型親和力十足，毛質柔順富彈性

胭脂及蜜粉兩用，作蜜粉掃使用利用圓弧斜邊沾取蜜粉，作胭脂掃用利用圓弧頂邊沾取胭脂，打造輕薄底妝及自然透紅好面色

花型掃分兩款大小，細size包裝盒設計為花間彩蝶場景，太有心思~

兔比敗嘅係大size包裝比較平凡，但要求下店員阿姨都送左一盒細盒

一支大size售價NT2800（約HK$750），絕不比一眾外國品牌平，不過一場黎到實體店兔比都乖乖投降，隨花型掃附有收納袋同鏡仔匙扣

實體店敗比網購好嘅地方係有得睇有得摸，貨可以慢慢check清楚，感覺安心得多~

店員阿姨相當友善，我地一干人擾攘左一段時間，全程佢都好好笑容(^^) 可能係家庭式經營，店內有兩隻猛吠嘅惡犬？！（但非常可愛）

以前都只係用洗頭水清洗化妝掃（慳得就慳．．．），不過最近獲得 林三益化妝掃專門店香港店 送出2款化妝掃清潔液，即管試試有咩分別！不含酒精之水性溶液配方，溫和界面活性劑，清洗完唔乾澀唔刺激，清潔仲養潤掃毛

綠色為深層清潔，而桃紅色為柔護滋養，兩款可以交替使用

用清水以1:1 - 1:4比例稀釋（視乎掃具污垢而定，膏狀化妝品殘留較粉狀難洗，清潔液比例自然要多D），有微香無著色，類似肥皂水

將刷毛浸響稀釋清潔液輕輕揉，化妝品殘留都乖乖溶解，兔比認為比過往用洗頭水清洗更快更有效去除污穢

最後順住刷毛方向響水龍頭下沖洗就乾淨晒！以紙巾按壓走水份，整理好原來形狀平放等自然乾就可以

每支30ml化妝掃清潔液售價為HK$59，跟大品牌比較相當划算呢~ 始終化妝掃掃毛都需要好好保護，洗頭水到底都唔及專用清潔產品

Categories: ● 化妝掃清潔液, ● lamsamyick, ● 化妝工具, ● 化妝掃, ● 心型掃, ● 台北, ● 台灣, ● 林三益, ● 花型掃, ● 旅遊, ● LSY, 妝物妝文, 敗家手記