覓食小記。。。點心真功夫！

前陣子開始愛上跟同事去功夫點心嘆點心，雖然天后一帶食點心嘅地方唔少，但好味之餘坐得舒舒服服就冇幾多間做到~

鋪面唔大但由於有兩層高所以座位唔少，而且位同位之間唔會過逼，整個地方乾淨企理，檯櫈裝潢大量採用木材，感覺樸實有特色

連點心紙設計都見花過心思，十足武林秘笈~

蝦餃皇蝦爽口味鮮，外皮軟綿又唔會過厚，而且夾起唔易爛，比好多茶樓出品更好食！(๑´ڡ`๑)

鮮蝦菜苗餃入面嘅蝦同外皮同蝦餃皇一樣，而且菜苗有濃濃蒜香又多汁；鳳爪好入味夠腍，幾款都係有水準之作~

酥皮香麻蘿蔔餅外面炸得脆脆，入面依然保持軟綿綿

蘿蔔絲清甜多汁幾配外層芝麻香，可惜比較油膩

強烈推介鳯凰煎糯米雞！兔比一向都唔鍾意食糯米雞，唯獨哩度嘅糯米雞一食就上癮囉~ 鳯凰煎糯米雞即係將糯米雞醮上蛋漿煎香，兩面都煎到金黃色，見到都食指大動꒰*✪௰✪ૢ꒱

咬落面層果然香脆，糯米口感煙韌，中央餡料多汁，口感豐富，正！如果餡料多D會更讚

腸粉軟綿又滑，蝦腸鮮蝦大隻兼爽口，叉燒腸叉燒味香（忘記影低=.="）

整體食物水準不遜色於獲米芝蓮而聞名嘅「添好運點心專門店」（前文回顧：覓食小記。。。值得等待的米芝蓮點心），更何況無需等餐飽又坐得舒服自在，可以悠然咁嘆多杯清茶(๑• .̫ •๑)

食完行出門口先知原來老闆係王俊棠（即係東華卡拉之星常客）哈哈！明星效果似乎有限，賣嘅堅係點心真功夫！

Categories: ● 天后, ● 王俊棠, ● 功夫點心, ● 食評, ● 點心, 飲飲食食