發表文章
由於唔係咩特別日子或假期，前三日都可以訂到聞名嘅長洲歐美式渡假旅館 B & B，標準房已滿改訂較貴嘅高級房（位於主樓），先過數入一半訂，check-in再付另一半
上次黎不知情下入住左東堤小築（慶幸無發生靈異事件，諗起都怕怕><），相比之下B & B真係超班！(๑✧◡✧๑)不單距離碼頭相當近，起碼唔駛擔心有靈異野，而且真係乾淨又企理，張床都夠舒服，只係略嫌房間較細
有牙膏、牙刷、樽裝水、洗頭水、皂液同即棄拖鞋提供，基本上唔駛帶日用品去
主樓天台可以望到幾遠景觀，仲有雜誌借閱
每朝10:30前會提供早餐，都係一般西式選擇無咩特別
由於兩日落雨無得踩單車，連櫻花都睇唔到(◞‸◟；) 唯有四圍行搵下好野食，B&B附近四圍都有地方搵食呢~
旁邊新照記車仔麵同糕點等等，食左大大粒咖哩魚蛋，咖哩汁夠惹味，魚蛋大粒得黎夠彈
往碼頭方向行時來食坊都有大大粒魚蛋，除左咖哩汁仲有沙嗲汁，大小口感都差不多仲多左粒普通size魚蛋~ 不過沙嗲汁始終不及咖哩正斗
不遠已嘅甘永泰非常受歡迎
有好多款即炸小食，當中推介大家試試其貌不揚嘅炸豆卜！
食左一輪小食點都要有飽肚野入口，去具名氣嘅張記魚蛋整碗四寶麵，丸算彈牙但味道只屬一般，感覺有點名過其實
坐得唔太舒服而且衛生情況唔太好，唯一賣點係夠古老（可以講係懷舊吧=0=）
由於臨近太平清醮所以期望可以親身一睇宏偉嘅包山，點知去到．．．(๑꒪ㅁ꒪๑)"
得座山？！請問D包呢？太失望啦！嗚．．．唯有買個平安包咬咬
忘記左間面包店個名，所謂平安包只係一個有餡嘅包，仲要咬左大半先食到少少餡，咁就盛惠$7賺到笑
夜晚去Moroco's一試印度菜，以長洲食店黎講環境好舒服企理~ 由於我地兩個人食只點左鐵板燒雞、咖哩蝦、蒜蓉薄餅（Garlic Nan）同芒果奶昔（Mango Lassi）
印度菜所謂奶昔（Lassi）唔同我地平時飲個種milkshake，味道同口感都似乳酸，酸酸甜甜幾開胃
咖哩顏色橙橙紅紅，初初上檯都唔知係咖哩，味道一D都唔辣，而係甜甜地有濃濃香料味，醮Nan絕對一流！(๑´ڡ`๑)
Nan內裡好鬆軟，不過單食始終比較單調同乾爭爭，所以店員都會建議配多汁嘅菜式一齊食，蒜蓉薄餅查實無乜蒜茸味，反正都係醮汁，大可以點返原味
鐵板燒雞一碟集好幾款口味，上檯個時店員會淋上檸檬汁，最頂有條狀免治雞肉條，兔比佬咬左一啖即吐返出黎，味道實在好羶꒰⁎×﹏×⁎꒱ 仲以為係羊肉呢~ 其他味道都OK，明顯雞醃得好透香料好濃，顏色透到好深層，不過兔比對哩類五顏六色嘅雞有點抗拒（特別係鴨屎綠個幾件．．．）
本來好想飯後去師妹甜品食個火燄雪山，可惜個日星期三唔做生意，嗚．．．而且當日到埗無買到故鄉茶寮嘅即制手卷同紅豆餅，離開長洲個日時間尚早仲未開門呢~ 雖然唔見以前個對日本人夫婦，又聞說味道已經失色左，兔比都仲好想親身試試，始終外面難食到哩種富鄉土人情味嘅樸素小食
離開長洲前去威堡食lunch，兔比點左蝦柳堡味道一般，得幾粒炸蝦實在唔多充實，而且個包無芝麻一D都唔香
兔比佬嘅熱狗都唔見得好好味(●･̆⍛･̆●) 無熱狗腸而係打孖嘅雞肉腸，仲要係非洲腸！
可恨離開個日一直落大雨，想逗留耐D都唔得！⁝⁞⁝⁞ʕ•༘͡.•ʔ☂⁝⁞⁝⁝ 唔知幾時再有閒情入長洲行下食下呢？
0 留言:
張貼留言