發表文章
Le Chef 位於香港灣仔維景酒店，前身係coffee shop，今年改革供應特色 “fusion” 菜式，而且仲會為客人精挑細選出獨特葡萄酒，以配搭各款菜式
環境雅緻有情調，個人覺得好適合情侶們黎撐檯腳呢~
正式上菜前先奉上暖暖麪包，口感外脆內軟，可伴牛油、蘋果醋、檸檬橄欖油及自家製蕃茄醬
黑醋橄欖油一向係perfect match，然而混入檸檬汁嘅橄欖油，又別有一番滋味，比普通橄欖油多左份清新感覺；而自家蕃茄醬口味清甜唔膩
比較不足係盛載醬料碟子太淺，比較難用匙羹撈起醬料身為幕後功臣嘅主廚Rick對食材處理最瞭如指掌，由佢親自介紹最合適不過，每道菜上檯時間佢都現身講講選材及製法特點，仲教大家點品嚐菜式，果然食都大有學問喔~
正式上菜啦！頭盤可以選配精選即開生蠔（Freshly Shucked Oysters）或白酒蒜片辣椒汁煮藍青口（Braised Australian Ble Mussels in White Wine Garlic Chilli），一向唔好生蠔嘅兔比當然選擇後者據Rick所講由於澳洲水溫交替唔穩定，改選用冒起之法國青口，味道鮮甜唔腥，醬汁味道香濃，蒜香混和微微酒美，口味竟然有點似中式煮蜆汁，初初仲擔心會太辣，反而辣椒味唔太出，芹菜味仲突出
配搭微果香Le Mourre de I'isle White 2011 - Vignobles David (AOC Cotes du Rhone)更突出海鮮鮮甜味
頭盤已經咁出眾，餐湯都唔可以失色，有朝鮮薊帶子忌廉湯（Cream of Roasted Artichokes & Scallop）及蜆肉菠菜湯（Clam & Spinach Soup）兩款選擇，而兔比選擇左前者，以為哩個忌廉湯不外如是？咁就大錯特錯！
上檯一聞何解個湯會有燒焦味嘅？原來朝鮮薊係需要燒過，否則個湯會變成酸有別普遍嘅濃厚質感，哩款會比較輕薄，Rick表示佢地嘅忌廉湯會先熬魚湯底然後加入忌廉，有別一般盲目加麵粉去增加濃厚度，而且湯都有分季節，夏天會製作比較輕嘅湯，上面有一隻煎得金黃嘅肥美帶子，好吸引喔~
飲落去又香又滑，帶子肉厚又鮮甜，飲晒全份都唔覺漏~ Rick叫大家大啖飲湯然後馬上飲一啖Jurancon sec White 2010 (AOC Jurancon Sec)，會出現一種淡淡雲尼拿味，只有一剎那感覺到，係一種特別嘅化學作用，可惜兔比始終試唔出哩種效果＞＜
緊接住就係主菜上檯嘅時候！香煎美極大蝦伴紐西蘭肉眼香草蒜蓉汁（Pan fried King Prawn in Maggie Sauce & Pan Fried New Zealand Rib Eye in Herb Garlic Sauce）或慢煮三文魚柳檸檬薄荷汁伴香煎羊鞍露絲瑪莉汁（Slow Cooked Salmon Fillet in Lemon Mint Sauce & Pan Fried Lamb Chop in Rosemary Sauce）都各有捧場客，兔比選擇左後者慢煮三文魚柳檸檬薄荷汁伴香煎羊鞍露絲瑪莉汁，建議先品嚐三文魚再到羊鞍；三文魚保持嫩嫩，醮少少檸檬薄菏汁就可以將本身鮮味帶出；羊鞍肉質柔軟而且唔會有大多數人都怕怕嘅羶味，7成熟唔會過生又保留到肉汁，而且兩面都煎到脆口
另一主菜香煎美極大蝦伴紐西蘭肉眼香草蒜蓉汁，由於香煎美極大蝦太惹味，最佳品嚐方法係先食肉眼再食蝦，先試得真兩者滋味，兔比都試左少少大蝦，肉質夠爽又鮮味，但唔連殼入口美極味就唔太夠
合適餐酒可以昇華味覺享受，因應兩款唔同主菜，服務員會為客人奉上唔同餐酒，肉眼配Prieuré la Red 2009 - Vignobles David (AOC Cotes du Rhone Villages)
羊鞍則配較dry嘅Mons Aureolus Red 2009 - Chateau Montauriol（AOC Fronton），對餐酒的確非常講究
為一餐劃上完美句號點少得女士們至冧嘅甜品？甜品雞蛋甜品拼盤（Eggs Dessert Platter）由Cream Brulee、Mango Egg及Chocolate Pancake組成，加入份子料理元素，有意想不到嘅口感味道，Rick建議由右邊食起
哩款Cream Brulee絕對非一般，表層並無脆脆焦糖而係好似cappuccino嘅泡泡，單嚐泡泡無咩味道，入面燉蛋富蛋香奶香，質感蠻creamy~
最後有用75%朱古力製作嘅Chocolate Pancake，Pancake太薄唔太有存在感，朱古力餡料口感竟然有如大菜糕，欠缺左濃烈朱古力但有咬口質感，Rick表示係故意咁做，令3款甜品都有意想不到嘅口感味道
配搭甜品嘅Flambant - Vignobles Gélis Special Sparkling sweet Red (Vdt) 稱得上女生至愛
濃濃葡萄及士多啤梨味絕唔會被甜品蓋過，唔覺唔覺已經飲晒一整杯
當晚好幸運身邊有杏仁同Ping Ping兩位美女相伴，品嚐美食之餘大家有講有笑特別開心！
網上認識杏仁一段時間，都係第一次面對面同傾計（之前都只係打過招呼），真人一樣咁親切~꒰ ુ⁎⁌̴̶̷ั ·̫ ˂̵͙ ૂ꒱໊ ˉ̶̡̭̭
Ping Ping當晚似乎有點醉，特別hyper，我地仲黎個合巹交杯 ꒰๑▪ꌂ ⁃꒱ॢ✩⃛
同兔比佬拍拖 7週年，尋晚特別帶隻佬去 Le Chef 嘆燭光晚餐，事前得到Marketing Pauline幫忙安排菜單，兔比佬都大讚食物唔錯，甜品上面仲特別寫上Happy 7th Anniversary，由細節可見心思，雖然兔比再光臨唔係blogger身份（只不過係普通客人），服務同樣殷勤周到
每月最後一個星期五Le Chef 都會舉行同類型 Wine Pairing Dinner，以悉心挑選頂級葡萄酒配搭層出不窮各款佳餚，如果客人有需要仲可以預早通知安排特別菜式
Le Chef 價錢雖然一定唔平，但食物同服務質素絕對會令人覺得物有所值，愛品酒愛Fusion菜嘅朋友推介一試！
0 留言:
張貼留言