大玩台中(2)。。。亡命馬術表演 + 眼科醫院敗手信？

唔覺唔覺台灣之行經已係一個多月前嘅事，心癢癢又想再去玩去食 XD 上回分享過到埗首日行程，合歡山上欣賞過台中嘅日出伴雲海（前文回顧：大玩台中(1)。。。懷舊寶島 + 台中的晨光），返回下榻嘅清境國民賓館稍稍休息，還好食左藥小睡一下兔比又復活，可以繼續行程！(๐ ́꒪̐ꈊ͒꒪̐)ꐳ

清境國民賓館環境唔錯，我地首晚住嘅5人房地方整齊企理，分上下層地方唔會好擠迫，露台仲有廣闊山林景緻~

Day 2首站係賓館附近嘅青青草原，青草地加一望無際嘅藍天靚到有如一張明信片，暫別香港嘅壓迫感心情特別好

青草藍天加荷蘭風情建築值當然係影相熱點

 

場內綿羊自由自在四圍走，訪客可以買飼料餵下綿羊

 
 

綿羊們都唔多睬人（可能我地無飼料吧==）而且見佢地烏卒卒都知其實有點臭，都係去睇馬術表演有娛樂性得多

每日青青草原都會有兩場馬術表演，表演團隊個個藝高人膽大，開始前兔比心想表演大概係跳下欄而已，原來唔係哩種普通層次

 

表演者響奔馳嘅馬上做出種種高難度動作，站立、倒立、騎膊馬等，仲可以由馬背跳落地再跳返上馬背，失手的話後果不堪設想，睇到觀眾都為佢地流一額汗

表演結束後觀眾可以同馬匹近距離接觸，合照或者餵佢地都可以，除左一批駿馬仲有馬仔呢~

離開青青草原大隊往台中鬧市出發，終於回歸城市！（因為一抵台中清泉崗機場感覺落後到似火車站，之後往清境都係鄉郊地方）

黎台中不得不一遊日月潭

除左遠觀潭境，附近冇咩地方好逛．．．

不過稍遠一點嘅向山行政暨遊客中心就絕對值得一遊！

兔比背後嘅景有點眼熟嗎？哩度就係楊丞琳Olympic相機廣告取景場地，起仲以為咁科幻感設計係外地取景，原來哩座以環抱日月潭為概念嘅建築物由日本建築師設計

哩度可以無遮擋遠眺全個日月潭景緻

由向山行政暨遊客中心往梅荷園一段路見到不少單車來來往往，踩住單車遊覽睇落的確幾寫意，睇過咸蛋黃我地又到下一站！

友人話要帶我地去宮原眼科買手信，令人摸不著頭腦？

 

外面望落古老，大堂竟然咁瑰麗堂煌，哩座建築物有80幾年歷史，的確曾經係眼科醫院，2008年由日出集團收購改造成哩座集手信店、雪糕店、珍珠奶茶店及餐廳嘅新地標

近門口位置玻璃櫃售賣精緻朱古力，哩款熊仔朱古力好吸睛喔~ 

行入去一個個書架上面陳列住各式各樣包裝得靚靚嘅台灣特色食品

價格雖然比較貴但送禮大體得多，而且味道的確一級捧(๑╹ڡ╹) 兔比一口氣敗左太陽餅、17號鳯梨酥及土鳯梨酥

打開包裝已經聞到濃濃香味（17號鳯梨酥有蛋黃咸香味），鳯梨酥餡料十足，比過往於九份小店敗嘅滋味得多！（溫馨提示：宮原出售之食品標榜不加防腐劑，保質期只有14日喔！）

 

除左敗手信，上層餐廳可以坐低嘆小食飲杯野，地下側面店分別售賣冰淇淋及台式飲品

冰淇淋口味選擇有近60種之多，單係朱古力味已經有20種

配料可選店內有售嘅土鳯梨酥、荷蘭傳統餅、巧克力雪球等等

見到咁大堆頭咁精緻睇到已經滿心歡喜~

外面古舊嘅紅磚拱型迴廊情調一流，不過座位唔多想坐住嘆要耐心等等

宮原珍奶飲品選擇唔多，但每杯都附送一件自選餅食，蠻抵飲！大手敗手信前大可以飲杯野兼試試味

眾人收獲咁豐富絕對要先到酒店，放低細軟休息左陣，我地就行去逢甲夜市醫肚，友人悉心安排嘅台中拓程旅館位置離逢甲夜市不遠，步行10分鐘就到

星期六為非工作日，所以星期五晚人特別多

逢甲夜市美食多就唔駛講，當中見最多人捧住嘅莫過於哩個豬寶盒，脆脆豬扒伴住醬汁食真係好好味喔！連配菜都食得乾乾淨淨，大家絕對要試試

下篇再繼續分享第3日台中之行 ٩꒰๑❛▿❛  ॢ̩꒱ To be continue．．．

Categories: ● 手信, ● 日月潭, ● 台中, ● 台灣, ● 青青草原, ● 宮原眼科, ● 旅遊, ● 草原, ● 清境, ● 逢甲, 玩樂遊蹤