覓食小記。。。鬧市中的小日本品嚐和風甜品

以前日本台場有個地方以老香港為藍本組成一個集餐廳同攤檔小天地叫“台場小香港"，唔知大家有冇去過呢？而尖沙咀鬧市竟然有個酷似昭和時代日本嘅小天地

哩度係位於活方開業無耐嘅菓子店瀰月屋，其實天后清風街店早已開業，只係一直未有時間去試試呢~ ٩ʕ•͡וʔ۶ 活動過後同水魚行左陣街，又想搵個地方食D野偈下腳，於是拉左水魚陪去附近嘅瀰月屋

店外面已有濃濃日本特色，客人可以選坐入面木檯櫈或外面嘅榻榻米

不得不讚店內裝潢，真係非常有心思~ 有好多懷舊擺設同廣告牌，連餐單都零舍有特色

不過第一次幫襯有好多款甜品，單睇名都唔太清楚係咩，多得侍應小姐耐心解釋~ 可惜當日有部分甜品已經售完，試唔到招牌蘋果批ʕ•ૅૄ•ʔ最後我地點左葛軟糍、抹茶草莓方、特濃抹茶咖啡同柚子蜜茶

葛軟糍到底係咩東東呢？好似mochi咁軟淋淋，點黃豆粉入口

有原味、黑糖同冬梅三款口味，而冬梅更加係冬季限定

味道淡淡然，唔會過甜過酸，不過水小姐無留意係梅味話好酸wo~

抹茶草莓方係一粒粒草莓味慕絲外灑上抹茶粉，草莓味唔會過份酸甜而且一D都唔假，草莓配合抹茶甘味原來都唔錯~ 口感上外層除左抹茶粉仲有結晶粒粒（應該係砂糖吧~），所以咬落外層有點脆口感，但入面係滑滑慕絲，截然不同

兔比幾鍾意特濃抹茶咖啡，抹茶紅豆冰或者奶綠茶就試得多，抹茶咖啡都係第一次試，估唔到都可以混合到不錯口味。相比咖啡抹茶先係主，可能愛飲咖啡嘅朋友會嫌咖啡味唔夠濃

水魚點左柚子蜜茶，杯底滿滿係柚子蜜，聞落就好香，兔比無親身飲過都唔知味道如何~

埋單冇記錯$120確實唔平，味道雖然唔差但不至於食過返尋味，不過同類型日式甜品店真係少有，偶爾都會再去試試品嚐另類口味呢~

Categories: ● 日式甜品, ● 京都, ● 抹茶, ● 昭和, ● 活方, ● 甜品, ● 菓子, ● 葛軟糍, ● 瀰月屋, 飲飲食食