DIY夢幻星空甲 ( •ॢ◡-ॢ)-♡。。。附印甲花教學片

早前分享過參與iMORE x Purple House 新春 Konad 指甲印花彩繪工作坊（前文回顧：無須巧手畫花。。。手殘都可以DIY靚靚甲花），上次經 Purple House 阿裴指導之後兔比終於掌握到印甲花一點小技巧，成功率大大提升！只要明白左再練習一下其實都唔係咁難~

兔比初中就買第一套KONAD印甲SET，而買到嘅地方竟然係觀塘工廈入面嘅一間賣玩具嘅地方！好奇怪吧？當時KONAD都係一種蠻新鮮嘅玩意，無人示範無人教，只有自己睇公仔睇字，成功將圖案印到指甲上面嘅成功率只有10%，低到興致都一掃而空！最後不得不得將成SET打入冷宮，曾經兔比都好氣餒，所以今次希望做個動態示範俾大家睇！

日前又身痕把玩一下D指甲~ 本來只係搽左兔比蠻喜愛嘅桃紅RMK Nail Color（佢其實已唔係第一次出鏡；前文回顧：兔比的過年大雜燴紀錄。。。小可愛回歸 & 川龍早茶與林村祈願黨），單搽又的確悶悶地嘅．．．所以響櫃筒搵呀搵，俾兔比搵到支紫色Revlon（仲有提子香甜味架！），底色一於玩玩漸變~

由於Revlon色調唔係屬於實色，所以唔用海綿印直接搽上指甲，搽好桃紅底色之後將紫色搽響指甲上半部，待乾後再搽上面1/4，有需要嘅話可以再搽上面甲邊，可能就咁睇邊緣會幾突眼，再搽左top coat之後會好好多

之後用嘅KONAD用具唔多介紹啦！所用image plate係M84，全部可以響Purple House敗到

將印油搽滿所選圖案，馬上用刮刀呈大概45°角一下過刮走多餘印油，將印花片上圖案轉移到印仔，接住將印仔上圖案印上指甲，唔係死力印而係好似滾筒咁轆過，就咁睇大家可能唔多明，所以特別拍左短片（放心兔比個樣唔會入鏡XD）

最後厚厚搽上KONAD專用Top Coat就大功告成啦！大愛哩種好夢幻感覺~ ( •ॢ◡-ॢ)-♡ 加上印花之後察覺唔到兩色甲油嘅交界吧？

雖唔係第一次同大家分享指甲DIY，不過都係以活動文同文末題外話形式居多，今後都想獨立share一下甲文呢~

Categories: ● 甲花, ● 印甲, ● 美甲, ● 教學片, ● 漸變甲, ● DIY, ● Konad, 玩甲DIY