星級Salon用心施「髮」

留左一頭亂草兩年多，天氣幾熱都唔捨得剪走。因為對上一次剪左個bob頭俾兔比佬埋怨，絕大部分男生對長髮女都有種情意結吧~ 何況留長髮可以玩多d hairstyle嘛！靜雞雞話您知目前為止兔比都仲未試過電曲髮（之前都只係捲同吹曲），所以呢點都堅持留長髮試試！為左電曲兩年黎都只係稍稍修修髮尾，保持住一個悶蛋頭．．．

早前收到首個體驗剪髮服務邀請，由O.H. Hair Salon髮型師操刀剪個夏日髮型，第一時間問清楚可唔可以唔剪成短髮先接受~XD 收到邀請信一睇真係傻眼！剪髮服務盛惠$480，當時無了解過O.H. Hair Salon嘅背景，心諗太貴了吧？！原來O.H Hair Salon來頭唔小，開業已經超過 17 年，曾為多個大型演唱會及時裝表演擔任髮型顧問，同時亦參與多位影視紅人髮型創作。當中星級顧客包括李克勤、周潤發、鍾楚紅、周慧敏、黃日華、吳家樂、洪天明、陳庭威、梁榮忠、汪琳、關禮傑、漢洋、陳蕊蕊同新晉組合 MVG 等。 

位於九龍尖沙咀富豪酒店地庫二層，一出尖東站N出口行幾分鐘就到，非常易搵！環境寬敞舒服又夠整齊乾淨，無見到一地都係頭髮碎景象。

今次幫我落髮嘅係Yashi，先了解一下客人打算點剪，兔比表示自己想電曲唔要剪短髮。Yashi話兔比本身係one length頭，無layer可言睇落厚重，捲曲髮感覺會墜晒落底。佢幫兔比剪返富layer嘅夏日感長髮，感覺會清爽得多，之後去電曲髮都會好睇。

剪髮前當然要先洗髮，洗髮過程真係好認真講究，不單力度岩岩好，除左頭皮仲會按摩額同頸，感覺紓緩放鬆。不過其實兔比頗擔心按摩額頭個時會捽走底妝，因為皮膚狀態仲好差，都係靠化妝先可以見得人，OH NO

Yashi睇得出兔比好緊張，一再叫兔比望下唔係剪左好多頭髮，只係剪薄左頭髮長度其實唔覺剪短左，真係夠細心~ Yashi話幫客人造型好容易，但往往客人自己set就好難，所以佢會教兔比自己之後點造型。剪好吹曲頭髮俾兔比做個參考，然後拎埋捲髮捧教DIY曲髮造型，仲特別就兔比自己角度去示範點捲。

先將頭髮分成左右兩邊，然後兩邊各自分成耳前耳後，耳後頭髮可再以眼眉位作分界線分成兩束，用捲髮捧將每束頭髮分別捲曲。先由髮中捲起然後移至髮尾，如果捲度太過，可以馬上用手輕輕拉拉髮絲，每束髮絲其實無需過份捲曲，因為當成頭都捲成曲髮視覺上就已經好明顯。

Yashi明白前蔭長得快，叫兔比咪自己亂剪，可以打俾佢約返齋修前蔭，10分鐘內可以搞掂，又俾左好多針對造型意見，實在好體貼客人所需~ 唔係就咁同客人剪左個頭就話之你，服務絕對用心！

剪髮後成個形像清爽晒，時尚感UP UP UP！哩個捲髮造型富日系感覺，大愛！剪左個靚髮，人都開心D~

Yashi同其他O.H. Hair Salon髮型師響iMORE有教學片教DIY頭髮造型，大家可以參考一下喔~

Categories: ● 理髮, ● 髮型, ● OH Hair Salon, 生活點滴