唔再只得頭文字C。。。終於等到平民價潔面刷！

一提起潔面刷好多人都會諗起Clarisonic，兔比認知入面除左Clarisonic就只有一D不知名品牌出品~ 曾經都有買Clarisonic嘅念頭，但礙於價錢太貴最終都冇付諸實行。

不過，今次兔比有個親民好介紹！今個月大家有個新選擇，皆因大家熟悉嘅Olay Pro-X首支潔面刷即將登場，售價約係Clarisonic 1/3 ($329)~ 兔比好榮幸獲邀於正式上架前試用Olay Pro-X Advanced Cleansing System (專業方程式™淨透煥膚潔面儀)

哩盒Olay Pro-X Advanced Cleansing System來頭絕對不遜於Clarisonic，產品設計集11大國際皮膚醫生、美英中港台頂尖專家、9大研發護膚博士同20年平均皮膚科學經驗同近1000人次皮膚產品測試，絕對係Olay Pro-X誠意之作~

第一眼感覺包裝好聖誕，因為係閃閃紅色包裝盒，或者可以買俾朋友仔作聖誕禮物吧~ 一盒除左有潔面刷仲有、Pro-X Exfoliating Renewal Cleanser（20ml）同AA電池

一開盒裝上刷頭同電池就馬上用得！無需叉電連帶埋去旅行都方便~ 兩粒AA電以每次用一分鐘黎講，大概至少用到180次

機身係防水設計，所以第一次要拆出電池隔一D都唔容易，要施以十級武力！弱不禁風嘅女生一定揾人幫手開，兔比揾晒全屋人幫手都開唔到，大家都話機身太滑抓唔住用力，最後兔比媽戴上膠手套先勉強扭開，不過對手套都爛埋，可想而知真係好難開如果下次產品設計可以加上防滑會更好．．．還好之後打開換電都輕鬆得多

刷頭採用獨特Nelon-12高韌性低損耗材料製成，半球形光滑末端刷毛溫和清潔避免損傷皮膚，而直徑只有80微米左右，可以深入清潔毛孔內污垢油脂。最重要係刷頭轉動個時都感覺舒適，唔損傷皮膚（當然唔好粗魯地將刷頭大力壓往皮膚啦！），有傷口位置同眼周肌膚太脆弱都不宜靠得太近~

為保證清潔效果建議三個月更換一次刷頭，安裝只需要將刷頭背面凹槽對準機身中間凸出位置，手握刷頭外圍邊緣按下就可以，而更換刷頭響Olay Pro-X貨架都有單售裝 ($99)

潔面刷有兩個轉速，按一下開關掣下面嘅轉速調節按鈕就可以調較速度，慢速每分鐘300轉（溫和去角質，建議每天使用），而快速每分鐘400轉（深層清潔，建議每周1-2次），一次過滿足晒兩個願望~

流線型設計機身非常好揸手， 當然電動野最忌水，不過大家可以放心，成個機身都極防水，就算一邊沖涼一邊用都絕無問題

每日早晚整濕面部同潔面刷頭，將潔面產品均勻塗抹響面部，選擇合適速率於面部打圈，沿T zone由下而上清潔，再往U zone兩邊臉頰由內向外清潔，以下特別拍左個Demo示範俾大家睇睇

除左以上方法，仲可以將潔面產品擠響掌心以潔面刷轉動打泡，懶人如兔比可以直接將潔面產品擠於已潤刷頭馬上往面部打圈清潔（好似用電動牙刷咁 XD 哩個方法一邊沖涼一邊洗面最岩）套裝附有哩支Pro-X Exfoliating Renewal Cleanser為有磨砂粒子潔面gel，泡沫粒子配方有助去角質。除左哩支Cleanser，潔面刷可以配合任何類型潔面產品使用~

套裝附有哩支Pro-X Exfoliating Renewal Cleanser 專業方程式去角質淨顏煥膚潔面乳 ($199)為有磨砂粒子潔面gel，泡沫粒子配方有助去角質。當然除左哩支Cleanser，潔面刷可以配合任何類型潔面產品使用~

粒子超幼細，配合埋潔面刷都絕唔會磨損皮膚，洗完面唔會繃緊，就算單用都係蠻不錯選擇~

盒上表示比傳統潔面有效6X，雖然有點誇張，不過用左一星期粉刺黑頭的確有減退，連帶毛孔都收細左，而且價錢咁相宜，兔比會繼續使用，大家都不妨一試~

特別一提Clarisonic採用聲波振動原理，而Olay Pro-X係刷頭轉動運作，對相黎講Clarisonic應該更勝一籌，有機會兔比都要入一部Clarisonic試試~

Categories: ● 洗面刷, ● 開架, ● 潔面, ● 潔面刷, ● 潔面儀, ● Clarisonic, ● Olay, ● ProX, 產品試用