妄想媲美TOKYO GIRLS COLLECTION的雷爆「女生天下」

上月初寧可放棄redeem bareminerals都要拉友人一齊去睇所謂香港史上最大型潮流祭 - 女生天下 (Fashion Fest for Girls)，真係令兔比蠻後悔．．．本想馬上出文狠批一下，但一直處於懶散狀態，搞到事隔幾乎一個月先動手打文

「女生天下」打正旗號係仿效日本時裝盛事TOKYO GIRLS COLLECTION (TGC) ，宣傳集時裝、音樂、娛樂、購物於一身。當然兔比係為時裝而來，睇過好多網路上宣傳消息都指有大會攤位，可以即時購買部份模特兒所穿著同款限量服飾，希望率先睇新裝之餘可以買到手

當日入座率非常低，大概只有六成，隨處可見吉位，可見宣傳夠晒失敗！

一早已講明有入場禮物，同友人由其中一個細入口進場並無人派發，但場內又見到有人拎住禮物袋同場刊，望勻晒都唔見有任何指示，唯入趁未開場行出去搵下，原來個場咁多出入口只有一個counter派禮物同場刊，仲有完全無明確指示牌，唯有搵工作人員問，排隊都好混亂

限定產品種類雖然不多，款色都唔錯，但價錢就算所謂優惠價都明顯食水深，化妝袋都盛惠$98，同樣款式出面大把啦！

由Mr.開場band sound打頭陣，氣氛都只係一般，始終個場太少人．．．衫靚唔靚大家taste唔同好難評論，但有品牌竟然仲拎D過氣衫出黎行show，有無搞錯？Fashion Show唔係應該預覽新裝嗎？

仲有中場DJ打碟時間太長，搞到個show好夜先完，D人都離晒場出去四圍行，最可笑係MC阿勞竟然開咪叫外面D人入返場話：「大家唔好掛住買衫啦！下part就快開始啦！」，但外面根本無宣傳所講賣model身上嘅任何服飾嘅攤位，兔比問過工作人員都話唔清楚，點解大會無同MC及工作人員夾過？枉大會仲自吹哩個係香港史上最大型潮流祭，安排得如此失敗簡直係笑死人！

雖然大會有安排免費旅遊巴送觀眾出旺角或銅鑼灣，但完全無任何指示牌話俾大家知響邊度等，而且旅遊巴車頭連目的地都無標明，又要靠自己開口問

大會設Best Dress Award選10位打扮得最潮觀眾獲得由Sony送出相機，只見有Sony backdrop但工作人員只係呆呆企響度吹水，完全無意欲叫大家影相參賽。最後得獎嘅所謂觀眾大多都係𡃁模，當中連藍莓劉俐都有份，有幾公正大家心中有數~

「女生天下」如果下年再搞得成懇請唔好再以TGC相提並論，咁只會更加貽笑大方！

Categories: ● 女生天下, ● 時裝, ● fashion, ● Fashion Fest for Girls, 活動分享