一試都嫌多嘅團購體驗@Sky21

兩三個月前見到有位於山林道嘅Sky21團購優惠，見到相入面嘅環境相當雅緻又有靚景睇，於是一口氣買左8位同一班好朋友飯聚

以上圖片專載自babybamboo.com

哩類團購券最煩係要先預約，同朋友夾好日子打電話去book先知booking超full，而且我地人多最快要一個月後，咁我地都理解，唯有book定兩個月後時間。事前已經問過邊日有位，booking個電話又難打，打到去book都唔代表有位俾，事關個接線人話如果有人包場就會取消booking，咁請問booking意思何在？唔通包場就係客，團購就冇俾錢？咁都算！最唔合理係前兩日都冇人通知到底有冇位俾（客人聽候佳音，好可笑吧！），唔通去到last minute仲期待有人包場？完全不合理！最後都要自己打去問．．．

有朋友仔之前話見到飲食雜誌介紹個環境幾唔錯，點知開餐當日上到去出入都幾大。地方好昏暗，又唔得乾淨企理，好彩個景除左遠左D都算唔錯，有個露台可以邊食邊睇景，不過落雨就唔知點算好

未開始上菜職員已經要我地俾左加一收費先（以原價計嘅加一服務費），最不滿係我地人多大家計數同夾錢都要一點時間，個職員放低張單唔肯走，硬係要企響度等好似要俾壓力我地咁，已經禮貌地叫佢俾D時間我地轉頭過黎，仍然郁都唔郁，唔通怕我地無錢俾加一？！感覺好差！

燒青口、翡翠螺同海中蝦算鮮味新鮮，無點調味所以會點沙爹或泰式醬汁

燒蠔真係太細隻，得個殼大，本來味道唔錯可惜有D燒到乾晒

秋刀魚無特別調味下好腥．．．

最令人失望係菜牌中嘅美味燒雞中翼、豬扒、雞扒同腸仔．．．成盆大堆頭咁上，坦白講未食見到一埋肉山已經無咩胃口，味道如何？唔荒好食，好似無點燒過，自己去BBQ個D一定惹味多多聲

所謂嘅蒜蓉炒蔬菜只不過係白烚菜，無任何蒜蓉香更加無炒過（忘了影相．．．）汽水同韓國啤酒係任飲，不過您想搵佢refill都難，好似無人理咁

美食算唔上，原價聲稱$468，如果哩餐係正價收費都真係呻笨！服務又差到不得了，再平都一定唔會再幫襯！

Categories: ● 山林道, ● 食評, ● 團購, ● babybamboo, ● bbq, ● Sky21, 飲飲食食