令人食指大動的芝士菜式。。。安坐家中都可輕鬆享受芝士火鍋的美味

兔比對芝士真係情有獨鍾，任何野好似加左芝士都好味百倍，最愛食芝士火鍋，以前只有好少地方有得食仲要好貴，宜家好在意粉屋都有

早前抽中有份參加F&B Club活動 - 瑞士伊美芝士烹飪分享班，又中埋十月blog中有奬，多謝F&B對兔比厚愛！（＾∇＾）

今日下晝去左禮頓中心既煤氣烹飪中心參加烹飪班，第一次去煤氣烹飪中心，環境好大呢~成個Theatre咁可以容納幾十人，仲有埋大電視照顧埋後面既朋友。

導師為大家示範3款分別以伊曼頓大孔芝士(Emmentaler）、格魯耶爾芝士(Gruyere)同愛班錫拿芝士(Appenzeller)做既菜式，有芝士酒香雜菌多士、芝士肉醬意粉卷同炸芝士火腿茸薯仔蛋。

平日意粉就食唔少，意粉卷都係第一次見（兔比孤陋寡聞...==＂），其實係一個筒形既闊麵，多左份新鮮感~用意粉卷比普通意粉卷花工夫，要小心咁將餡料鑲入去，用唧袋會比較方便。導師話左個煮意粉貼士俾大家聽，原來意粉係唔可以過冷河或沖水，煮完既意粉應該會有d 黏，如果一洗左層黏野d粉就唔上汁，咁就自然冇咁好味啦！另外煮菇既時候加D白酒或者拔蘭地可以辟左陣up味

最花工夫做係薯仔蛋，打爛薯仔切材料撈混，仲要搓成蛋形，上蛋白同麵包糠先炸，工序較多，食就開心煮就咪搞我

由於時間既關係幾道菜已經小預先準備好咁多人既分量，大家都可以一嚐示範菜式

兔比覺得意粉卷同薯仔蛋最yummy~芝士味好出match到其他材料。仲有芝士火鍋俾大家試味，個人覺得哩款酒味比較重，如果唔太受得酒既仲有一款無酒味既選擇，不過傳統既係酒味較濃

咁岩坐隔離係另一blogger Mika，見面兩次終於相認啦！Mika，下次會認得您架啦！

有點失望既係無得自己親自煮埋一份，得個睇字...不過臨走前每人收有一份由伊美芝士送既gift都好啦！有一包芝士火鍋同兩份朱古力火鍋，可以自己係屋企慢慢嘆啦！成包材料倒入鍋煮溶至軟流就食得，唔洗自己較味咁麻煩，岩晒懶人，哈哈！

喜歡芝士既你有無流緊口水先？如果你都想試試芝士火鍋同其他各種芝士可以去大間既supermarket揾搵~

Categories: ● 伊美, ● 朱古力火鍋, ● 芝士, ● 芝士火鍋, ● 烹飪, ● 瑞士, ● DIY, 飲飲食食