與blog友們一同享受的甜品盛宴 @ K11

日前好榮幸可以有份參與K11 Paris Fashion Week - Paris Night法國盛會之法國品牌工作坊，當日活動分為4個主題，Paul & Joe春妝魅力、Paul Lafayet甜味之旅、I Love Kitchen法式甜品DIY同Arka法式甲藝坊。兔比咁為食當然唔會錯過食好野嘅機會啦！一如所願參與Paul Lafayet甜味之旅，可以一次過食多款Paul Lafayet甜品，多謝theZtyle同K11^^

活動開始大會先安排我地一行40多位blogger欣賞由A cappella表演，唔知大家知唔知咩係A cappella？

所謂A cappella即係無樂器伴奏，純人聲清唱形式。為大家表演嘅本地無伴奏合唱組合係Musepaper，佢地一行五人，兩位男生作bass，三位女生負責主音和音，唱左好幾首動人歌曲，最後個首Nobody仲又唱又跳，好厲害~

其實之前都已經慕名幫襯過K11 Paul Lafayet，因為佢地製作嘅Macaron都幾出名，兔比特登去買黎試試。

場地為B1一個空置舖位，遠處已見人龍等候入場，原來除左我地一班blogger顧客好似消費滿指定金額都可以參加。由於場地比較狹窄，加上擺放左食品檯令到逼上加逼完全唔知道Paul Lafayet代表已經開始介紹><

 

大家逐一排隊拎喜愛甜品，件件都好精緻！仲有提供餐酒同香檳等飲品

 

 

 

不過人太多又冇位就座，一邊拎住相機一邊拎住碟擠響人群入面，好難影到靚相，大家都好狠狽．．．

 

大會安排左幾張高檯俾大家享用甜品，還好可以搵到個冇咁逼位置企定定食野。同好幾個blogger同檯，大家邊食邊傾好似置身酒會~今次活動參與人數較多，四圍都撞見熟悉blog友~^^一齊大飽口福嘅有+yiu、千千、Aman。大家Cheers~

 

 

拎左好多件Macaron，每款口味都試試~心水推介cappacinno同伯爵茶，當然唔少得兔比至愛朱古力！cappacinno咖啡味香，伯爵茶感覺清新，朱古力甜味重同濃郁。

 

除左macaron，仲有多款迷你甜品包括Tiramisu、Blueberry Cheese Cake、Strawberry Tart、Lemon Tart等等，兔比當然絕對唔會錯過！今次真係過足甜品癮，食到飽~Tiramisu旁個款以小杯載住嘅甜品好好味（忘記叫咩名=="），入面有菠蘿同芒果粒粒，口氣滑滑又香甜，感覺好岩夏日。

 

 

 

期間Paul Lafayet老闆Toni親身問下一大家意見，俾大家捉住左合照~可能大家都會奇怪點解老闆唔係叫Paul，Paul其實係老闆爺爺名字而Lafayet係另外加上去。

 

食飽之後大家紛紛到贊助商拎小禮物，包括有MiXTRA送出Arnold  Palmer Tote Bag同Ovenhouse Deluxe送出Portion Cake及France Handmade Chocolate。

Arnolder Palmer Tote Bag有兩色可揀，MiXTRA店員哥哥為我地擺好display影相，同耐心數人數俾貨，大部分人都揀黑色呢~

 

 

美中不足係Ovenhouse Deluxe店員似乎唔多友善，未知係咪我地太多人，店員感覺唔耐煩且黑面．．．咁既服務態度似乎連普通連鎖餅店都更殷勤．．．加上店內被禁止影相拍唔到D咁精緻甜品，頗掃興！

 

最後帶左件Portion Cake去K11小庭園留倩影，原來兔比個件響短短路程已經被毀左容，大家都睇得到嗎？返到屋企已經被瓦解，影唔到相><哩款Portion Cake叫Lady Peach，比較少見以桃做主角甜品~ 中間有一層厚厚桃味Jelly，周邊被Cream Cheese包圍，難得一款清甜口味

 

 

講到造型一定係Brownie最出位，上面有一個巨型朱古力波作裝飾，好有氣勢吧~鳴謝Kiko借出Portion Cake作Model XD

 

活動之後又見到小黑Mi同ballet tata，結果join埋佢地加lazybone同技安食飯，成餐都笑料送飯XD 唔覺唔覺返到屋企原來已經過左十二點

 

感謝K11安排今次盛大活動，令人留低個美好回憶！要讚讚K11環境好幽雅富藝術感，空間感十足，行到攰又有地方可以俾人歇歇腳，好欣賞外面個小庭園提供一個鬧市中喘息空間。

Categories: ● 法式甜品, ● 馬卡龍, ● K11, ● Macaron, ● Paul lafayet, 活動分享