覓食小記。。。跟水魚佐敦揾食 品嚐燒龍蝦特式腸粉

早前Giorgio Armani活動中得到修眉券，相約定水魚一齊去Element專門店修眉。

雖然不同BA，態度同樣親切，仲教兔比點畫眉。修眉前左右粗幼形態不一，修眉後兩邊眉形一致而且加強線條感。

之後水魚帶路行去佐敦揾食，一講開佐敦兔比忽然諗起之前成日出現響飲食誌嘅燒龍蝦，無奈一直冇去試過，好彩有水魚做導遊~行左一陣決定入「龍蝦燒」試試~

無聊拍XD 薄施脂粉嘅水魚唔肯出鏡以機遮面

招牌燒龍蝦，分$38、$48、$68唔同價錢游水龍蝦，醬汁有蒜蓉、牛油芝士，可加芒果粒。我地order左芒果芝士同芒果蒜蓉龍蝦各一。本來話全部龍蝦已經賣晒，好彩最尾唔邊度跑出多兩隻，如果唔係多少都約有所失。

實物上檯比想像仲細一點，半隻兩啖已KO。燒完都保持到好多肉汁，鮮味十足，肉質爽口，一邊食一邊讚好

。蒜蓉燒好惹味，但牛油芝士同龍蝦鮮甜味似乎仲夾，反而芒果肉太少食唔出。

扇貝size唔算細，加蒜蓉燒好match，同樣超鮮味~

炸墨魚咀食得多，燒都係好似第一次食。大大粒脹卜卜，比起炸到亁晒好食得多！

燒菠蘿好鮮甜好多汁，食完好開胃！

鵝肝多士下層係蒜蓉包，上層鵝肝煎到外層有點脆口，口感唔會油膩。

燒煙肉蕃茄係perfect mix，香口煙肉包多汁蕃茄，感覺清新。

哩款貌似豆砂窩餅嘅係豆皮三文治，兔比都係第一次見。個外皮似腐皮，入面夾住蔥蒜，好特別嘅配搭~

之前去BBQ有人教燒茄子，開半加蔥花蒜蓉去燒，一試就愛上！哩度燒茄子同樣好味，茄子本身好juicy再吸收左蔥蓉味，正！

叫左兩大杯野飲解渴，水魚個杯好似係竹蔗茅根（唔太記得＞＜），兔比叫左奇異果汁冰，好似加左好多色素而且味道普通。

特別讚一讚入面個侍應阿姐好Nice仲好幫手，每食完一碟就快手清走吉碟，仲大把位擺野食。兩個為食妹唔覺唔覺食左$320，雖然唔夠飽不過好滋味。

見唔夠飽水魚帶兔比去阿蘇都推介過嘅堂記腸粉專門店食埋特式腸粉。腸粉選擇多元化，唔只蝦、牛仲有好多款唔同餡料配搭，款款不過十幾蚊。雖然已經過左晚飯時間都唔少捧場客，由於腸粉都係即製，要等大概15min-20min。點左蝦米魚片腸同蝦米燒鴨腸。

腸粉皮夠軟滑且皮薄！蝦米魚片腸莞茜味太重，蓋過魚嘅鮮味，可惜~反而蝦米燒鴨腸味道唔錯，燒鴨味濃，鴨肉肥瘦適中，推介一試~

最後嗚謝水魚做導遊去食好野，下次再去食過，wakaka！

兔比其他覓食小記：

覓食小記。。。邊食邊玩的紙上燒

覓食小記。。。食過返尋味嘅「快」餐

覓食小記。。。值得等待的米芝蓮點心
平民價享受即席日式鐵板燒。。。仲有型男睇？！

Categories: ● 佐敦, ● 食評, ● 堂記, ● 腸粉, ● 燒龍蝦, 飲飲食食