覓食小記。。。團購的特盛鐵板燒＠K11 AKU

之前都有同大家講過最近兔比愛團購，不時會留意下有咩筍野買。早前響Funshare就買左二人前AKU 特盛鐵板燒，見兔比佬終於有時間馬上打電話book定食晚市，前晚就去左K11度開餐食好野。

由於兔比只係前一日先book所以要排到9pm，不過現場所見客人唔多，大部分座位都無人坐。

地方好寬敞闊落，坐得好舒服，裝潢可見明顯主打高檔路線。一坐低就有侍應上茶、set位同奉上menu，照呼不錯。

今次團購「AKU 特盛鐵板燒」包括︰(二人前之菜式一樣，只係份量雙倍)
1) 田園風味沙津 ($28)
2) 鐵板燒海中蝦 3 隻 ($60)
3) 鐵板燒銀雪魚 ($78) / 三文魚 ($49)
4) 鐵板燒魷魚 ($48) / 燒帶子貝 2 隻 ($40)
5) 日式炒雜菜 ($29)
6) 海膽炒飯 / 炒麵 ($48)
7) 味噌湯 ($20)
8) 精選甜品 ($25)

原價要 $657.8-$739.2，團購價 $358即平均每人 $179，連加一服務費都包埋，超抵食！基上都係選擇銀雪魚 / 三文魚同魷魚 / 帶子貝 ，同兔比佬兩個人一人揀一款樣樣都可以試下。

檯頭每位都提供芝麻醬、海鮮醬、醬油同海鹽4隻調味料，唔知咩點咩好。

Order冇幾耐就上沙律，新鮮爽口生菜加甜甜栗米，上面有紅腰豆，配以芝麻醬，比千島汁更清新滋味。

之後有專人去到面前開始燒食材，先係海蝦、魷魚同三文魚。

三文魚燒到金黃，但內裡未熟透仲好juicy鮮嫩。

海蝦大大隻，好爽好有咬口，師傅建議可以點海鮮醬入口，不過其實就咁入口同點醬都各有滋味。魷魚切到好細條，唔馬上食好快就凍晒。

第二round燒銀雪魚同帶子貝，帶子貝好大隻，好鮮味！

銀雪魚都係燒到金黃，保持到魚肉好嫩，而牛油香同銀雪魚好夾。

之後有炒飯、炒麵同炒菜，兔比覺得最正係個炒飯，未食已經覺得師傅炒得非常好，炒得夠乾身，飯粒粒分明被蛋漿包住，靚到不得了~

炒麵同炒菜雖然味道唔錯都被比下去啦！

值得一讚係師傅會就客人口味問一下意見，由於係為指定客人燒所以口味可切合不同喜好，而且師傅耳好靈，由於無人加茶兔比跟兔比佬細聲講無茶（其實想兔比佬開聲叫人加XD），師傅就叫同事過黎幫我地加。

食晒D野久久都無人上味噌湯同甜品，由於一入場張團購單已經被收起，兔比都唔記得左仲有野未到，打算走之際先有侍應幫我地上甜品，係cookie & cream ice-cream，無咩特別之處。

食食下甜品先醒起仲有湯，之後問侍應係咪個餐包埋，佢反問我地未上嗎？真奇怪！明明全場都唔多客都咁亂？！

離開個時好奇走近金魚池，金魚仔立即游上水面張口，好搞笑~個樣同波兒真係幾似^^

黎哩間食令兔比不其然同之前沙田新城市個間IKI日式鐵板燒比較（前文回顧：平民價享受即席日式鐵板燒。。。仲有型男睇？！），食材同樣新鮮，不過AKU價錢唔多親民，但好在味道可就個人而調較，而且都免於等位吧~XD

渥鐵板燒日本料理（AKU Teppanyaki ）Openrice專頁：http://www.openrice.com/restaurant/sr2.htm?shopid=39158

Categories: ● 日本料理, ● 食評, ● 渥, ● 團購, ● 鐵板燒, ● AKU, ● K11, ● Teppanyaki, 飲飲食食