覓食小記。。。值得等待的米芝蓮點心

一輪妝物同護膚文章，兔比又回歸食文（又掛住食XD）~早前諗唔到有咩地方好去，於是又帶兔比佬去搵好野食，今次去嘆期待已久既米芝蓮點心。

相信大家都有所聽聞，講緊既咪就係響旺角既「添好運點心專門店」~

早有聞說入去食野要先過一關．．．就係要等得。個日兔比去未算係晚飯既黃金時間（大約18:30），招牌都未見就先見到一堆人就知無搵錯地方。成個門口都圍滿人，除左本地人仲有唔少遊客。拎左飛等輪檯號，由於人太多又無位企於是先去附近行下街街，大約半個鐘後再返去睇睇，總共等左約45分鐘，無想像中咁耐，而且可以拎左飛周圍行下所以好快過

入去前填定點心紙，一坐低就交得。同兔比佬兩個人叫左6個點心，連埋每人$2茶錢（無加一收費），總數$88埋單算係中價，米芝蓮一星食肆都唔係貴

從外面可見舖面唔大人又多，位坐得好迫，同兔比佬兩個貼住另外兩位坐，隔離要出入就要行出黎讓一讓，如果您要求坐得舒舒服服，佢絕對唔會係您杯茶。坐低無耐就收到單，詳細列明Order左咩幾錢同總數，清清楚楚

唔係等好耐就有熱辣辣累點心食啦！仲一次過上左幾籠

豉汁蒸鳳瓜

鳳瓜超軟身，阿婆都食得個種，兔比幾鍾意~（咁早已經成為阿婆了嗎？）好入味，yummy~


晶塋鮮蝦餃

真正既皮薄涵靚，外皮夠薄而且軟軟但唔易爛（最怕個D一夾即爛既頹皮）入面D蝦又大又爽口多汁（唔係加左野好假既口感），蝦個比例好高食唔出有肥豬肉，真材實料！應該係我試過最正既蝦餃~

鮮蝦燒賣皇

由於兔比唔食燒賣，只係兔比佬一人食晒，佢話唔錯。

金蒜波菜餃

皮同蝦餃一樣，全隻漲卜卜都係波菜餃，可能嗜肉者唔鍾意，不過食得出材料好明顯係揀過，入面既波菜都新鮮多汁，絕唔係好dry似食草個種，難得清新之選

杞子桂花糕

軟軟既唔係狂加魚膠粉個種質感，清清甜甜，不過無咩特別。

雪耳蓮子百合糖水

甜味唔夠（不過兔比好食得甜），都係平平無奇~


見到隔離4個老外齊齊食，每款點心一人一份，叉燒包一份已經有3個，點食得晒？！張檯都放唔晒，呆左．．．

另外個樓面阿姐好搞笑，起初佢響門口派飛覺得佢串串地，不過原來係Nice既，會同客人吹下水，仲提醒兔比桂花糕堂食先好味，打包會變水晒左

款款即叫即蒸熱辣辣上檯，試左幾款蒸點心都超水準，甜品就難有分別。除左蝦餃燒賣餃正，佢地既皇牌仲有酥皮焗叉燒包，不過兔比無點到~希望有時間可以再去食過!

同場加影：豪大大雞排登陸

台灣夜市聞名既豪大大雞排已經係旺角開店（兆萬對面），超級多人排隊一試，條龍長到過晒馬路。係咪真係咁好食呢？

兔比覺得其實味道一般，只係辣辣地又好脆夠惹味（超熱氣！），一塊兩個人分好D，女仔自己一個恐怕會食唔晒．．．食完要馬上飲野撲撲火！都係少食為妙~

Categories: ● 米芝蓮, ● 炸雞排, ● 食評, ● 添好運, ● 豪大大, ● 蝦餃, ● 點心, 飲飲食食