甜到入心。。。DIY情人節朱古力靈感發放！

2011年第一個月唔覺唔覺過左大半，二月將至除左農曆新年外，情人節都黎緊啦！女生又係時候開始準備情人節禮物~過往幾年兔比都會做DIY情人節朱古力俾兔比佬同朋友仔，唔知大家會唔會一樣呢？

No idea？！等兔比俾D靈感您！

最簡單當然係溶左D朱古力倒模成第二個樣，不過就心思欠奉

之前兔比做過生朱古力（Melty Miss）、朱古力米通同朱古力mochi，大家可以參照一下。朱古力米通同生朱古力都超易做！朱古力mochi就好複雜同難整得靚，如果您玩開煮野食同想向難度挑戰先好試，唔係盞玩死自己。

下圖係兔比2007年既大作（搵唔返其他作品既相）

生朱古力

黑朱古力 100g
橙酒 1湯匙
無鹽牛油 15g
淡忌廉 30ml
可可粉/糖霜／抹茶粉 適量

做法請參考 http://www.jusco.com.hk/chi/10_plaza/info/200701_1/index.htm#choco2

朱古力米通

朱古力
脆米或可可脆米
原味棉花糖（BBQ個款）
無鹽牛油

做法：
1. 朱古力、牛油同棉花糖用微波爐煮溶拌勻（份量不拘，只要夠黏住晒脆米就OK！鍾意黏D甜D就加多D棉花糖）
2. 加入脆米倒落平盤壓平（厚薄隨意）
3. 放入雪櫃雪硬後自由切成任何形狀。

上圖既成品用左Meji士多啤梨朱古力同原味脆米所以係粉紅色，朋友仔取笑似未煮熟既肉餅

朱古力糯米滋（mochi）

糯米粉 100g
砂糖 20g
椰漿 80ml
水 80ml
生朱古力（請參考上面）
可可粉 適量

做法：
1. 糯米粉、砂糖、椰漿、水混攪混成糯米漿（無粒粒就可以停手）
2. 糯米漿入微波爐高火叮3分鐘煮成粉團
3. 趁熱將生朱古力以粉團包住然後搓圓
4. 全粒沾上可可粉

2日內要食晒！兔比個次辛辛苦苦做好擺過左2日，全部mochi變晒化石，成擔心機無左．．．

處理朱古力小知識

- 鍾意酒香既話可混入少少Rum酒、橙酒或Bailey Cream等
- DIY朱古力2-3日內要食用，不宜擺太耐
- 溶朱古力可以熱水坐溶或微波爐，但記得不時攪拌，過熱會令可可油同可可分離凝固
- 朱古力唔可以接觸水分同水氣

整好左成品當然要包得靚靚仔仔啦~Jusco $10店有好多靚靚包裝盒同袋仔，選擇比甜品材料店更多更靚，不過要早D去買，唔係D好野就賣晒架啦！

上星期好幸福再次抽中F&B Club 1月份會員尊享活動—情人節朱古力班~

可能兔比真係與「食」有緣，繼上次既芝士烹飪班（前文回顧：令人食指大動的芝士菜式。。。安坐家中都可輕鬆享受芝士火鍋的美味），今次又有份參與另一至愛朱古力製作班

地點係我之前工作左好一段時間既地方- SOGO CLUB 16/F Leisure Corner，算係舊地重遊吧~今次好開心有水魚相伴，是日佢係一條病魚，蠻擔心被佢放飛機呢！還好佢精神唔錯乘機出走XD

今次學做Chocolate Truffle同夾心朱古力加埋心形朱古力盒，由於製作需時，去個時已經見到一檯都係導師準備好既材料~

導師先講解一下做法同示範，然後大家分成兩組分別做Chocolate Truffle或夾心朱古力之後再交換，大家都有機會全部試做^^

孖住水魚一組先做Chocolate Truffle^^時間關係導師已預先將朱古力座溶 ，混和好牛油同cream，用唧袋擠出一個Kiss朱古力形狀。

為左令朱古力更易上粉先將暖暖既朱古力漿搽係手上（為免變成黑指甲大家都戴左手套），然後將朱古力好似湯丸咁搓圓，睇下水魚對手幾嗱咋XD

沾上糖霜或可可粉就完成~係咪好靚呢？口感好幼滑同Melty Kiss差唔多，沾上糖霜會較可可粉甜好多

之後去做夾心朱古力，哩款比較花時間。先將朱古力漿注入膠模，然後倒返出黎將周邊朱古力漿刮走，將模反轉等多餘既朱古力流出，膠模上面既朱古力凝固後可自由加入夾心（想快既可放入雪櫃）！

導師為大家準備左朱古力脆脆、Nuts同Rum酒提子，切記唔好貪心加太多，一定唔可以高過個模，否則會包唔到個底。

再倒朱古力漿係面封返底，用抆刀刮走多餘既，再輕輕拍拍個模有助氣泡排走，免得粒朱古力雪硬左會穿窿~雪到見到粒朱古力同個膠模分離就可以脫模，哩個步驟要用少少暴力搖同拍。最後用刀仔修修邊位，大功告成啦！

心形既朱古力盒做法唔太複雜不過就要非常小心，將朱古力漿注入膠模倒返出黎將周邊朱古力漿刮走，再將模反轉等一下多餘既朱古力流出，仔細睇睇朱古力漿均勻覆蓋好膠模就可以雪硬

是日完成品，包裝得靚靚就可以送俾人啦~收到都心甜吧

Categories: ● 朱古力, ● 朱古力糯米滋, ● 食譜, ● 情人節, ● Chocolate Truffle ● 巧克力, ● DIY, ● Leisure Corner, ● SOGO CLUB, 生活點滴, 玩甲DIY