發表文章
上個月兔比跟同事食厭左愉景灣既野食，於是就相約搭船過坪洲食晏，不過今次唔係去之前介紹過既快車（請看前文：和稈蓋珍珠！阿蘇都推坪洲平凡飯店滋味餐），因為怕被伙計認出。。。改嘆港式老冰室，行行下去左賣傳說中既蝦多士個間冰室。
上次試過蝦多覺得普通不過，所以此行只食茶餐廳套餐，自從返工後食茶餐廳次數就少之又少，偶爾食厭左愉景灣快餐同日韓餐廳都好想試下新鮮野。
要搵蝦多士就要認住個招牌啦！
哩種咁舊式既卡位宜家幾乎已經絕跡，十分懷舊
餐牌上除左招牌蝦多仲有湯麵、三文治、西多、沙律、雞翼，＄20-28連熱飲，凍飲都係加$2，以食勻愉景灣既兔比黎講可謂經濟又實惠，連埋船費都平過愉景灣搵食。叫左個雙丸XO醬湯米線， 米線唔會煮得太淋，丸不過不失，簡簡單單都好滋味
砌左笑面見到嗎？
（同事知我大食醒左兩塊餐肉俾我）
不過紅豆冰就真係唔錯，紅豆煮得岩岩好，唔太爛好有咬口但唔會好硬，味道唔會過甜。
雖然野唔係特別好食，如果旨在享受一下冰室滋味同坐低嘆下茶係唔錯選擇，個人好似變得好悠閑咁
食飽飽行出門見到隻肥貓，要攝佢入鏡即刻用個背脊對住我，好高竇
每一個推及留言都係小妹出文動力啊~謝謝支持!
0 留言:
張貼留言