發表文章
上文講左婚禮前一日準備功夫，正式個日一早姊姐齊集酒店房執下個樣個換衫，我地9個人太多，本來驚新娘化妝師同助手應接不暇會化得好求其，最尾成半人另外搵化妝師，所以為求方便都用返主角個化妝師助手算，不過好似化得麻麻，無特別遮個眼圈同highlight有D失望，真睫毛都無處理過同排假眼睫分得超明顯，最慘個日唔想帶野無化妝品係手都無法，但個頭都SET得唔錯。女主角個妝個髮型超級靚，不過唔就方便post
當大家都化妝既時間，有件奇事發生。其中一個姊姐發覺條裙有好多條橙橙紅紅既痕，但前一晚大家Fitting個時係乾淨既，之後都無拎過出黎。後來發覺原來上面個D係血跡，個位姊妹隻手損左流血摸左上條裙度，但自己唔察覺受傷，好離奇
影左一輪相新郎同兄弟團就殺上黎，怱怱抝左一輪，收左兩封假野先收到真野，其實大家都知時間比原定遲左所以哩part好快完。之後開始玩兄弟，Game 1要兄弟著上大會準備既毛毛bikini同T-back，要用口同單手幫另一個人著，所以都幾難著下。。。要著到玩晒game為止，著好之後兄弟們應攝影師要求擺晒post。Game 2要兄弟們一邊做Sit-Up一邊係新郎Pat Pat上面打唇印，最後攝影師要求佢地係新郎重要部位再打唇印，雖然不文但十分爆笑
Game 3要戴上眼罩咬衣夾上面既糖，個衣夾除左糖仲有襪同百潔布，不過我地好講衛生夾得上去既都係全新未用過~
玩完當然唔少得新郎朗讀愛的宣言，哩刻真係好sweet呀！雖然宣言內容有點搞笑成分，不過就非常窩心，羨慕死人啦~ 之後新人敬茶俾女家親戚，本來已經安排好各姊妹幫手做咩，但當時大家都亂晒，有野無人做就去做人個份但自己又無做好本份，無應新娘要求mark邊個俾邊封利是同金飾。。。之後大隊去男家再敬茶，今次打死都記得要mark野，敬茶前預先問定男家親戚送咩，等我地mark左先免得混亂，點知有親戚麻煩又話係私隱唔想講。。。到時交俾新人都知你送咩啦！講咩私隱？仲當住新人面串我地，好委屈。。。
之後兄弟姊妹們同親戚去飲茶醫肚，因為要Check Out兔比同另外兩個姊妹返酒店房pack野走，點知執野執耐左趕唔切去Join大隊食野，半日都無野落肚。。。好彩偷到時間急急食左兩件西餅，好似餓鬼投胎咁大啖大啖咬。之後又要趕去註冊場地，註冊場地係始創中心樓上既”奇妙姻典“，主角book左3個場地其中既“幸福小教堂”，感覺跟教堂一樣咁靚，衰在樓底太矮拋唔到花球。睇住新人係大家見證下註冊結婚，真係好戥佢地開心，要搵到岩既人走到哩步真係唔易。當日既新娘子同平日熟識既佢好唔同，穿起婚紗特別Charming，幸褔既女人好似會發光咁Sharp~
完左註冊大家坐車出去響MEGABOX既Wedding Banquet場地準備，set好迎賓檯同相簿檯終於可以有時間抖抖氣，半日連水都無飲過，終於食到其他姊妹打包既點心，都未食完又要補妝同set頭，還好開席前仲有時間可以影下相同吹下水~
由裝飾公司佈置既Backdrop、迎賓檯同相簿檯好靚呀！成個主題色粉紫襯白色樹葉同lace好夢幻又唔濁氣
雖然成個Wedding Banquet無表演，不過新人就事先等登拍左幾段模仿吉百利、 益力多同蝦餃廣告既搞笑片娛賓，仲搵人剪片同配樂，然後幾段片串連成一個故事，超有心思，雖然短短幾分鐘但娛樂性同創意十足
全程新娘子都無食過野，之前仲晚晚準備Wedding細節搞到訓又唔夠，結婚搞一日準備左成年幾，真係唔講得少，唔怪得好多人話一切從簡，索性旅行結婚好。不過話晒人生大事，一世人一次點都要好好安排留個美好回憶。
短期內唔希望做姊妹住，又擔心做唔好又忙到無啖好食。今次overall都順利，各位姊妹都辛苦啦！
每一個推及留言都係小妹出文動力啊~謝謝支持!
0 留言:
張貼留言