趕走異味。。。大汗精的盛夏恩物

夏天日日行出室外都大汗疊細汗，恨不得快D溜返入冷氣地方避暑，老實講兔比唔怕熱（都算吃得苦吧~），只怕曬黑同發臭

夏天除左抗曬少不了就係止汗，之前同大家介紹過防曬品（前文回顧：Stop Sun-Kissing！推介防曬品大匯集），今次就介紹兔比最近試過覺得蠻滿意嘅止汗產品。

兔比自問汗腺尤其發達，比起好多男士仲要大汗，行完一round工地往往聞到自己身上有陣陣＂宿＂味，所以寧願麻煩D都堅持要換衫。

QB止汗香體膏由日本原裝進口，咪話兔比崇日，日本出產嘅東東信心點都大好多!

佢係醫藥部外用品，安全性有可靠認證。有效成份包括酸化亞鉛及氧化鋅等，抑制汗、收緊汗腺、吸臭同殺菌功效長達7天，杜絕體味臭狐源頭，徹底消除身體難聞氣味。通過抑制發汗減少汗液排出，有別其他止汗香體噴霧靠堵塞毛孔起效。

超的式包裝，放入化妝袋都非常慳位。

用手指直接沾取塗抹，白色軟膏推開即時變成粉末。無色無味，皮膚唔會搽到死白。最怕某D止汗劑陣味俗到難以忍受，想再噴香水又怕變左異味，用左無味嘅QB再搽咩有味產品都唔怕，俾埋男朋友用都得~

最重要係絕對乾爽，丁點笠同油膩都冇，都無需要等佢乾又唔怕會整污糟D衫。

搽左汗流量依然驚人，不過聞唔到任何異味，唔怕汗臭嚇親人啦！雖然標榜止汗除臭達一星期，不過兔比覺得效果last唔到一星期，大約3-4日要再補搽。

不過兔比嫌要用手指沾取比噴同直接搽麻煩，而且指甲容易刮到過多份量。比較可取係QB採用天然成分，不含香料同防腐劑，敏感皮膚都可以用，而且都無需日日都搽，所以5g份量都可以用到好一段時間。想趕走汗味又懶日日搽止汗產品，QB止汗香體膏係唔錯選擇！

Categories: ● 止汗, ● 止汗香體膏, ● QB, ● QuickBeauty, 產品試用